22 августы Хицауады æмбырдгæнæн залы уыд радон æмбырд. Æмбырды куысты хайад райста Президент Кокойты Эдуард, афтæ ма республикæйы министрадтæ æмæ ведомствоты сæргълæуджытæ горæттæ æмæ районты администрациты къухдариуæггæнджытæ.

Æмбырды раныхас кодта мидхъуыддæгты министр Уалыты Валери æмæ хыгъд сарæзта, къуырийы дæргъы цы фыдракæндтæ æрцыд республикæйы территорийыл, уыдонæн. Уый куыд загъта, афтæмæй бынат уыд автомашинæ адавыны, наркотикон буарадтæ парахат кæныны æмæ давыны цаутæн. Мидхъуыддæгты министр ма куыд загъта, афтæмæй дарддæр цæуы Мидхъуыддæгты министрады кусджыты аттестаци.
Уый фæстæ ныхасы рацыд экономикон рæзты министр Колыты Константин æмæ æрæмбырдуæвджыты базонгæ кодта хъæууон хæдзарады æмæ хъæууонхæдзарадон продукци уадзæн сæудæджерады фæдыл республикæйы социалон-экономикон рæзты программæимæ. Уый куыд банысан кодта, афтæмæй абоны бон сæйрагдæр куыст цæуы хъæууон хæдзарады æмæ сæудæджерады къабæзты - фермæты арæзтад æмæ хъæууонхæдзарадон продукци уадзæн сæудæджерадон куыстуæтты реконструкци æмæ модернизаци кæныны хъуыддаджы. «Ацы къуыри бацæттæгонд æрцæудзæн Ленингоры районы цы фермæ арæзт цæуы, уый фæзуат, иу-дыууæ къуырийы фæстæ та йæм ласт æрцæудзысты æфсæн конструкцитæ. Къуырийы фæстæ та кусын райдайдзæн æхсыры фермæйы арæзтад Цхинвалы районы», - загъта министр. Йæ ныхæстæм гæсгæ ацы фермæты арæзтад у иууыл гуырахстджындæр. Уый ма куыд банысан кодта, афтæмæй октябры фæуды æмæ ноябры райдианы фермæты къултæ арæзт фæуыдзысты æмæ монтаж кæнын райдайдзысты ифтонгæдты.

«Уæрæсейы хъæууон хæдзарады министрадимæ куыст цæуы фос æрласыны тыххæй. Январь-февралы фос æрласдзысты фермæтæм», - банысан кодта министр. Уый ма куыд загъта, афтæмæй фосæн холлаг ныридæгæн у цæттæ.
Сæудæджерады куыстуæтты реконструкци æмæ модернизацийыл дзургæйæ та Колыйы-фырт банысан кодта, зæгъгæ, «æхсыры заводы реконструкци кæнын дæр райдайынхъус у. Уырдæм дæр æрластæуыдзæн æмбæлон ифтонггæрзтæ. Дзидзайы комбинат арæзт æрцæудзæн ногæй. Консерваразæн заводы тыххæй арæзт æрцыд контракт, уыцы контрактмæ гæсгæ æрластæуыдзæн италиаг ифтонггæрзтæ».
Колыты Константин ма куыд банысан кодта, афтæмæй «ацы къуыри æлхæд æрцыдысты ифонггæрзтæ Цхинвалы ветлабораторийæн». Уый куыд загъта, афтæмæй куыст цæуы кæсаджы хæдзарады рæзтыл, афтæ ма мыддардыл дæр». Йæ ныхæстæм гæсгæ кæсаджы хæдзарадæн дыууæ къуыримæ æрластæуыдзæн ифтонггæрзтæ æмæ хæринаг, мыддарды ифтонгæрзтæ та ныридæгæн закъаз сты бынаты. «Ам арæзт æрцæудзысты æмæ сæ балхæндзыстæм».
Колыты Константин ма æрдзырдта сæудæджерады программæйыл дæр. Куыст цæуы завод «Эмальпровод»-ы, уым цалцæггæнæн куыстыты æмрæнхъ æвæрд æрцыд профнастиль уадзыны тыххæй ифтонггæрзтæ, перспективæйы ма æлхæд æрцæудзысты ифтонггæрзтæ панелтæ уадзынæн. Ахæм уавæр ис завод «Вибромашинæ»-йы дæр. Уым дæр цалцæггæнæн куыстыты æмрæнхъ сæйраг цехты æвæрд цæуынц ифтонггæрзтæ дæр. Фæуынхъус у арæзтадон æрмæджыты заводы арæзтад дæр, цыран уагъд цæудзæн прессгонд æрмæджытæ. Уый куыд загъта, афтæмæй арæзт æрцæудзæн «Бæгъиаты» заводы ног хахх, кæцыйы фæрцы минералон дон конд цæудзæнис авгын мигæнæнты, йæ хъомысад уыдзæн 4500 иуæджы.
Колыйы-фырты докладмæ байхъусгæйæ Хицауады Сæрдар Вадим Бровцев сарæзта ахсджиаг фиппаинæгтæ. Уый куыд банысан кодта, афтæмæй саразын хъæуы æппæтдæр, 21-æм æнусы куыд аразынц, афтæ. Кæд завод сцалцæг кæныныл цы æхцайы фæрæзтæ хардз цæуы, уыдон бирæ нæ хицæн кæнынц ног заводы арæзтады хæрдзтæй, уæд саразын хъæуы ног завод. Уый фæстæ радта æмбæлон хæслæвæрдтæ хицæн министрадты минæвæрттæн.
Уый фæстæ раныхас кодта арæзтады министр Хуыгаты Чермен æмæ банысан кодта, зæгъгæ, арæзтадон куыстытæ дарддæр дæр цæуынц. Арæзт цæуынц фæндæгтæ Ленингоры районмæ,Знауыры районы фæндæгтæ дæр цалцæг цæуынц. Республикæйы скъолатæ æмæ сывæллæтты цæхæрадæтты цæуы цалцæггæнæн куыстытæ. Республикæйы Президент Кокойты Эдуард дæр бахæс кодта Мидхъуыддæгты министрадæн, цæмæй фæткхалджыты ныхмæ æнæ компромистæй ист цæуой æмбæлон мадзæлттæ. Уый ма бацымыдис кодта, æмбæстæгты хæдзæртты арæзтад куыд цæуы, уымæ æмæ бахæс кодта æмбæлон адæймæгтæн, цæмæй ацы хæдзæртты арæзтад ацæуа, куыд æмбæлы, афтæ.
Зассеты Жаннæ дæр æрæмбырдуæвджыты базонгæ кодта бæрæгбонон программæимæ.
ОСИАТЫ И.