Кусæг дæсныйæдтæ фæпарахатдæр кæнын, æмæ фæсивæды сразæнгард кæнын рохуаты аззайгæ дæсныйæдтæм – ахæм хæс сæ размæ æвæрынц профессионалон ахуырады кусджытæ. Семæ разы сты промышленнон куыстуæтты специалисттæ дæр.
Æрвылаз арæзт æрцæуы профессионалон дæсныйады конкурс, æмæ дзы фæсивæд равдисынц сæ арæхстдзинад.
Раздæр цæхæркалгæ дидинджыты кой æрмæстдæр аргъæутты уыд фехъусæн. Ныр та сæм нæ бон у бакæсын дæр, къухтæм райсын дæр. уый та æрмдæсныты руаджы. Ууыл сæ сахуыр кæнæн ис æрмæстдæр сæрмагонд дæсныйæдтыл архайгæйæ. Чысыл не сты. Хæринаггæнджытæ æмæ хуыйджытæ, хилдасджытæ æмæ чъырæй цæгъдджытæ, æндадзджытæ æмæ аразджытæ, згъæртимæ кæнæ хъæдæрмæгимæ чи кусы, уыдон æмæ бирæ æндæртæ.
Иууылдæр, ахуыр кæнгæйæ, сæ размæ æвæрдтой сæрмагонд хæстæ. Алыхуызон конкурсты архайгæйæ та аргъ кодтой кæрæдзийы арæхстдзинадæн. Афтæ ныр дæр.
Толасты Владислав: «Ахæм мадзæлттæ фæсивæдæн фадат дæттынц базонын иннæ сывæллæтты. Сæ схæн лымæндзинад гуыры».
Елойты Зураб: «Ацы конкурстæ хорз сты уымæн æмæ студентæ кæрæдзийымæ зонгæ кæнынц, сæ кæрæдзийы хуыздæр базонынц».
Кокойты Ибрагим: «Нæ зæрдæйы ис равдисын нæ училищæйы куыд хорз у, цас дæсныйæдтæ дзы ис райсæн. Нæ уæгъд рæстæг куыд фервитæм, уыдæттæ».
Профессионалон училищæты æмæ лицейты студенттæ сценæйыл цы программæ æвдыстой, уымæ кæсгæйæ, æцæгæйдæр æнкъард ничи кодта. Хъæлдзæг худт æмæ къухæмдзæгъд – уымæн æвдисæн.
Толасты Владислав: «Цæмæй царды мидæг сывæллæттæ фылдæр зоной, кæрæдзийы хуыздæр æмбарой, раст фæндагыл куыд цæуой, уымæн хорз сты ацы конкурстæ».
Уыцы хъуыды хорз кæсы студенттæм, стæй сæ разамонджытæ æмæ жюрийы уæнгтæм дæр. Æхсызгоныл ма нымайынц уый дæр æмæ фæсивæдмæ кæй ис сæхи цæстæнгас, сæхи хъуыдытæ æмæ фæндтæ.
Баситы Каринæ: «Мæн ма фæнды цæмæй ныры сывæллæттæ уынгты ма бадой, ныр куыд вæййы афтæ. Цæмæй сæ культурæ, се гъдау, се фсарм раджы заманты куыд уыд, афтæ куыд уа. Цæмæй ныр дæр афтæ дарой сæхи, уæлдайдæр чызджытæ. Уый мæ тынг фæнды æмæ куыд ма рох кæнойирæттæ кæйс ты, уый».
Ахæм æрыгæттæм кæсгæйæ, жюрийы уæнгтæ сты иузæрдион – рох сæ нæ уыдзæн нæдæр хистæрты хуыздæр миниуджытæ, нæдæр равзæрст дæсныйады сусæгдзинæдтæ.