Уæрæсейы алы регионтæ ацы зымæг тынг хъыгдард баййæфтой митæй. Уый тыххæй фæфылдæр сты фæндаггон фыдбылызтæ, уæдæ цæрæн-коммуналон хæдзарæдты куыст дæр фæкъуылымпы ис. Фæлæ нæ республикæйæн уымæй тæссаг нæу. Ног азы се ппæт дæр æнхъæлмæ кастысты миты рауарынмæ. Фæлæ бæрæгбоны æхсæв зымæджы ацы хорзæх фенын бантыст æрмæст Цъæйы комы чи уыдис, уыцы адæмæн.
Зымæг митæй фидауы, фæзæгъынц. Фæлæ нæ ацы аз зымæг уыцы хорзæхæй нæма сбуц кодта. Ног азмæ се ппæт дæр æнхъæлмæ кастысты митмæ. Фæлæ фыдæнхъæл фесты. Æндæр хъуыддаг, Цъæйгомы йæ фæллад чи уагъта, уыдон. Бæрæгбоны æхсæв хæхтæ сæ уæлæ скодтой сæ урс дарæс. Æмæ кæд къахдзоныгътыл бырынæн фаг нæ уыд, уæддæр алчидæр ссардта йæхи аирхæфсынæн хъуыддаг. Хæххон-рекреацион комплекс «Цъæй\"— ы уымæн æппæт фадæттæ дæр ис.
Комплекс «Цъæй\"— ы территорийыл ис 4 базæйы: отельтæ «Сказка» æмæ «Виктория», пансионат «Орбита» æмæ альплагерь «Цей». Ивгъуыд фæлладуадзæн бонты дзы уыдис 300 адæймагæй фылдæр. Уыимæ се рдæг æрбацыдысты нæ бæстæйы алы регионтæй.
Дарья Корчагина (Мæскуы): «Мах стæм Мæскуыйы авиацион институты альпинистты къорд. Цъæймæ æрбацыдыстæм спортивон нысантимæ: хохмæ схизын, къахдзоныгътыл абырын. Ам ныл тынг хорз сæмбæлдысты, тынг дзæбæх адæм дзы ис».
Цгъойты Анжелæ: «Фыццаг хатт æрбацыдтæн. Мæ зæрдæмæ тынг фæцыд. Нырæй фæстæмæ арæхдæр куыд цæуæм, ууыл архайдзынæн. Тынг рæсугъд дзы у. Æрбацыдтæн мæ бинонтимæ. Æрбаласта нæ нæ сыхаг Хестанты Мишæ. Уымæн дæр стыр бузныг. Уый руаджы мах стæм ам».
Хæстæгдæр фидæны Цæгат Ирыстоны туристон комплексы æрцæудзæн ивддзинæдтæ. Фæзындзæн бирæ ног фæлладуадзæн бынæттæ. Хæххон-рекреацион комплекс «Цъæй\"— ы разамындмæ дæр ис сæрмагонд нысантæ.
Хестанты Михаил, хæххон-рекреацион комплекс «Цъæй\"— ы специалист: «Фидæны æнхъæлмæ кæсæм хуыздæр рæстæгмæ. Ног базæтæ байгом уыдзысты, архайæм, цæмæй нæ коммуникацитæ хуыздæр кусой, æмæ нæм фылдæр адæм цæуа, ууыл».
Фæлæ уый фидæны. Ныр та уал ам æнхъæлмæ кæсынц æцæг митмæ, цæмæй зымæгон экстремалон спорты хуызтæ чи уарзы, уыдоны зæрдæтæ бахъæлдзæг кæной.